Duda  Vujičić, učiteljica iz naše škole,  jedna od najboljih na svijetu

        Profesorica razredne nastave u našoj školi, mr Dušanka Duda Vujičić, dobitnica je prestižne svjetske nagrade“Global Teacher Awards”. Nagrada za najboljeg nastavnika svijeta se dodjeljuje nastavnicima koji daju poseban doprinos svojoj profesiji. Ta posebnost se ogleda kroz doprinos nastavničkoj profesiji, kako na lokalnom, tako i na globalnom nivou. Nagradu dobijaju oni nastavnici koji obrazuju mlade ljude da budu aktivni članovi društva, nastavnici kojima je učionica tijesna, pa pronalaze adekvatnija mjesta za podučavanje učenika, nastavnici kojima je cilj da oko sebe imaju uspješne kolege pa rado dijele znanja i ideje, nastavnici… baš ovakvi kakva je učiteljica Vujičić. Ona je odavno  prepoznata i priznata kao nastavnica posvećena radu sa djecom, nastavnica koja je dala doprinos unapređenju obrazovanja u Crnoj Gori i šire,  kroz različite aspekte svog rada.

      Na takmičenje za najboljeg nastavnika svijeta konkurisalo je preko 400 000  prosvjetnih radnika iz više od 70 država, a žiri je izabrao stotinu najboljih. Nagradu je uspostavio AKS (Alert Knowledge Services) iz Indije, koji radi sa školama iz cijelog svijeta i to na edukaciji: direktora škola, nastavnika, bibliotekara i savjetnika u obrazovanju, sa ciljem izgradnje boljeg društva kroz obrazovanje.

         Dodjela nagrada, statua i diploma  upriličena je 15. septembra u Nju Delhiju, na svjetskoj obrazovnoj konferenciji ''Global Teacher Conclave & Awards 2019”.

        Čestitamo profesorici Vujičić i želimo joj još mnogo nagrada i priznanja.